Beschrijving
De schriever Jan Siebo Uffen, geboren 9 augustus 1942 in Noordloaren (Gr.) oet olders van t Oldamt, schrift van de zesteger joaren of veul verhoalen, gedichten en laidjes in zien moudersproak. Bie tieden gevuileg, bie tieden rebelsk, bie tieden schienboar allain kurendrieverg; mor zien vrolekhaid stait sikkom nooit lös van zien eerns.
Hai is begonnen in t striedboare tiedschrift “Twijspaalk” van prof. H. Entjes en Grunneger veurman S. van Wattum; op t heden dut e veul veur t literaire tiedschrift “Krodde” en veur Radio Noord. Hai is aktief van d’ schaauwburg tot t onderwies veur t Grunnegers: hai dragt geern veur. Mor op pepier ontdekt men der nog n verdaipen-of-wat bie tou! Veur n haandvol van de verhoalen, gedichten en laidjes het e erkennen kregen van onderschaaiden jury’s.
De taikenoares Janny Kouvaras, geboren 21 jannewoarie 1951 in Leiden (Z.-H.), waarkt al joaren mit schriefstift en pepier. Ze het bie Ton Hoogendoorn n joar of wat “Illustroatsie-taiken” doan, op de Vrije Academie in Den Hoag, en is mit de PTT dizze kaant op raaisd. Vrumd was Grunnen bepoald nait veur heur, omreden heur femilie oet Beem komt.
Janny Kouvaras het illustroatsies touleverd aan t twijmoandelks tiedschrift van de centroale directie. Heur taikens binnen moakt mit n techniek doar doezenden daauwdruppen inkt bie valen; de teksten in dit bouk vangen t licht op van dizze klaaine kunstwaarkjes.
“Elk bouk mout de muite weerd wezen om zien kunstenoarschop, m wat veur sproak den ook” (Gerd Spiekermann, Hamburg 1984).
“Ain dij “De” kedo geft, huift ter in aais geval niks meer bie te zeggen” (Hanny Diemer, Grunnen 1989).
